Tilgangslaust Raus
Jæja, ég ætlaði loksins að druslast til þess að bæta myndum frá Perú við ljósmyndasafnið mitt og skannaði inn hvorki meira né minna en 60 myndir frá ferðalaginu! Síðan bara gekk ekki neitt! En ég var nú fljót að leita á náðir snúru-snillinganna og þar benti hin fræga Sario-Mario mér á að eflaust væri ég búin með plássið mitt hjá www.pbase.com. Við nánari athugun kom í ljós að þetta var auðvitað hárrétt. Þannig að ég verð barasta að búa til nýtt ljósmyndasafn sérstaklega fyrir Perú-ferðina. Ég ætla að minnsta kosti ekki að eyða út hinum myndunum sem ég hef sett þarna inn. Ég læt ykkur fylgjast með þegar þetta er tilbúið. Ég var allt í einu að fatta það að það eru bara 3 vikur eftir í kennslu hjá enskudeildinni í Háskólanum. Ég er að vinna í BA-ritgerðinni minni og á að skila henni í byrjun janúar. Ég er samt búin með það mikið að ég hef hugsað mér að vera búin á innan við þremur vikum! Hvernig líst ykkur á þetta plan? Er ég ekki mikill ofurhugi? (gubb, gubb) Ég er alla veganna ákveðin í því að vera ekki að vinna í þessu um jólin, það er alveg á hreinu. Ógeð að vera á síðustu stundu í geðveiku stressi og gera síðan villur eða eitthvað svoleiðis. Ég nenni ekki að tjá mig meira núna. Ég er eitthvað svo andlaus.
Óþolandi Klámtrúður eða Andsetin af Djöflinum?
Ég er gjörsamlega búin að vera tryllt í skapinu í allan morgunn. Aumingja Lázaro á þetta nú varla skilið. Ég er bara búin að vera í RAGE í marga klukkutíma. Búin að kvarta og kveina og nöldra alveg stjórnlaust. Þetta er sko MJÖG ólíkt mér þó að ég segi sjálf frá. Ég er ekki svoleiðis týpa, er eiginlega alltaf voða vel stemmd. Ég er núna í vinnunni og maður bara dauðskammast sín. Ógeðslegt samviskubit bara. Ég á ekki til orð. Það er ekki eins og maður hafi yfir einhverju að kvarta, það er allt í svoleiðis fínasta standi hjá okkur núna, fyrir utan það að íbúðin er ógeðslega skítug orðin. Ég þreif reyndar klósettið (bölvandi og ragnandi) áður en ég fór í vinnuna og þegar Lázaro fór að mótmæla geðfrekjunni í mér þá hreytti ég framan í hann að ég gæti alls ekki tekið hans umkvörtunarefni alvarlega þegar hann liti út eins og klámtrúður. Hann var nefnilega nakinn og með alveg hvítar varir af því að hann var að borða skyr. Guð minn góður! Ég hagaði mér alveg eins og einhver kerling með fullkomnunaráráttu. Ég skil bara ekkert í þessu. Ætli ég sé í einhvernju hormóna-kasti eða eitthvað? Strange....látið mig vita hvað þið haldið að hafi komið yfir mig? Ætli ég hafi verið andsetin af djöflinum? Þá gæti ég að minnsta kosti firrt sjálfa mig allri ábyrgð....Múhahaha!!!
Nínos hefur tjáð sig.
